koi ghazal ho ye lahja nahin badalte hum

koī ġhazal ho ye lahja nahīñ badalte ham

ki sach ho kitnā bhī kaḌvā nahīñ badalte ham

kisī galī se ye rishta nahīñ badalte ham

tumhāre ba.ad bhī rasta nahīñ badalte ham

khulī kitāb ke jaisī hai zindagī apnī

kisī ke sāmne chehra nahīñ badalte ham

lahūluhān hoñ nazreñ yā ruuh ho zaḳhmī

hamārī āñkhoñ kā sapnā nahīñ badalte ham

tamām umr hī ab kyuuñ na ḳhatm ho jaa.e

tumhāre pyaar kā qissa nahīñ badalte ham

jo jaisā hai use vaisā hī ham ne chāhā hai

mohabbatoñ meñ ye sikka nahīñ badalte ham

vafā kī raah ke pakke haiñ ham musāfir bhī

mileñ na manzileñ rasta nahīñ badalte ham

kisī kner ke phūloñ se surḳh hoñTh us ke

guloñ se aaj bhī rishta nahīñ badalte ham

tamām shakleñ hameñ ek jaisī lagtī haiñ

kisī ke vāste chashma nahīñ badalte ham

kaTā-phaTā hī sahī hai ye pairahan sach kā

na.e libās se kapḌā nahīñ badalte ham

ye gul-mohar kī haiñ shāḳheñ kisī ki yaad liye

kisī kī yaad kā chehra nahīñ badalte ham

kabhī yahīñ pe hī aa kar vo baiTh jaatī thī

isī liye to ye kamra nahīñ badalte ham

koi ghazal ho ye lahja nahin badalte hum

ki sach ho kitna bhi kaDwa nahin badalte hum

kisi gali se ye rishta nahin badalte hum

tumhaare baad bhi rasta nahin badalte hum

khuli kitab ke jaisi hai zindagi apni

kisi ke samne chehra nahin badalte hum

lahuluhan hon nazren ya ruh ho zaKHmi

hamari aankhon ka sapna nahin badalte hum

tamam umr hi ab kyun na KHatm ho jae

tumhaare pyar ka qissa nahin badalte hum

jo jaisa hai use waisa hi hum ne chaha hai

mohabbaton mein ye sikka nahin badalte hum

wafa ki rah ke pakke hain hum musafir bhi

milen na manzilen rasta nahin badalte hum

kisi kner ke phulon se surKH honTh us ke

gulon se aaj bhi rishta nahin badalte hum

tamam shaklen hamein ek jaisi lagti hain

kisi ke waste chashma nahin badalte hum

kaTa-phaTa hi sahi hai ye pairahan sach ka

nae libas se kapDa nahin badalte hum

ye gul-mohar ki hain shaKHen kisi ki yaad liye

kisi ki yaad ka chehra nahin badalte hum

kabhi yahin pe hi aa kar wo baiTh jati thi

isi liye to ye kamra nahin badalte hum