koi hansae to hans dun rulae ro lun main

koī hañsā.e to hañs duuñ rulā.e ro luuñ maiñ

ye zindagī hai to phir is se haath dho luuñ maiñ

maiñ harf-harf rahā huuñ salīb-o-dār-ba-dosh

to phir jo tū ne kahā hai use bhī tolūñ meñ

jinheñ salīqa-e-iz.hār-e-ārzū hī nahīñ

vo log chāhte ye haiñ zabāñ na kholūñ maiñ

mire ḳhudā ne mujhe bolnā sikhāyā hai

to phir jo harf-e-yaqīñ hai vo kyoñ na bolūñ maiñ

sahar huī to yahāñ saḳht mā'raka hogā

abhī to raat kā pahlā pahar hai so luuñ maiñ

ye qaum murda-parastī ke fan meñ māhir hai

ye mujh ko ro.egī kal aaj is ko ro luuñ maiñ

haram se duur hī kitnā hai but-kada 'ḳhālid'

ab aa gayā huuñ idhar to udhar bhī ho luuñ maiñ

koi hansae to hans dun rulae ro lun main

ye zindagi hai to phir is se hath dho lun main

main harf-harf raha hun salib-o-dar-ba-dosh

to phir jo tu ne kaha hai use bhi tolun mein

jinhen saliqa-e-izhaar-e-arzu hi nahin

wo log chahte ye hain zaban na kholun main

mere KHuda ne mujhe bolna sikhaya hai

to phir jo harf-e-yaqin hai wo kyon na bolun main

sahar hui to yahan saKHt ma'raka hoga

abhi to raat ka pahla pahar hai so lun main

ye qaum murda-parasti ke fan mein mahir hai

ye mujh ko roegi kal aaj is ko ro lun main

haram se dur hi kitna hai but-kada 'KHalid'

ab aa gaya hun idhar to udhar bhi ho lun main