koi harf-e-nafi na kaam aaya

koī harf-e-nafī na kaam aayā

kitnī sachchī thī dostī apnī

Thokareñ khā ke ke surḳh-rū Thahrā

ik du'ā hai ye zindagī apnī

ab kahāñ hai koī harīf apnā

ḳhuub Dartī hai be-kasī apnī

kaise tārīḳh ko bhulā Dālūñ

ḳhuuñ meñ Duubī hai ye sadī apnī

kuchh na khātā huuñ kuchh na piitā huuñ

bhūkī sotī hai muflisī apnī

ḳhālī botal takā hī kartī hai

kitnī pyāsī hai mai-kashī apnī

shāyad apnā ḳhudā tarāsh liyā

ab kahāñ hai vo bandagī apnī

shāyad 'iqbāl' se Darī hogī

pahle sarshār thī ḳhudī apnī

saare alfāz saath chhoḌ ga.e

saada kāġhaz hai shā'irī apnī

kārvāñ chhoḌ ke vo aayā hai

ik musāfir hai rahbarī apnī

koi harf-e-nafi na kaam aaya

kitni sachchi thi dosti apni

Thokaren kha ke ke surKH-ru Thahra

ek du'a hai ye zindagi apni

ab kahan hai koi harif apna

KHub Darti hai be-kasi apni

kaise tariKH ko bhula Dalun

KHun mein Dubi hai ye sadi apni

kuchh na khata hun kuchh na pita hun

bhuki soti hai muflisi apni

KHali botal taka hi karti hai

kitni pyasi hai mai-kashi apni

shayad apna KHuda tarash liya

ab kahan hai wo bandagi apni

shayad 'iqbaal' se Dari hogi

pahle sarshaar thi KHudi apni

sare alfaz sath chhoD gae

sada kaghaz hai sha'iri apni

karwan chhoD ke wo aaya hai

ek musafir hai rahbari apni