koi ilzam na duniya mein kisi par rakhna

koī ilzām na duniyā meñ kisī par rakhnā

dil lahū ho bhī to chehre ko gul-e-tar rakhnā

ḳhaak kā ho ki ho kāñToñ kā vo bistar ai dost

niiñd aa jā.egī takiya tū ḳhudā par rakhnā

kyā ḳhabar raah meñ kab saath ḳhushī kā chhūTe

zindagī ġham ko bhī saath apne barābar rakhnā

dekh āñkhoñ kī zamīñ hai na laraz jaa.e kahīñ

ai tasavvur tū yahāñ paañv sañbhal kar rakhnā

zānu-e-yār samajh kar use so jā.eñge

ham ġharīboñ ke sirhāne zarā patthar rakhnā

chāhtā hai ye mire daur kā dastūr 'nasīb'

tishnagī dil meñ to āñkhoñ meñ samundar rakhnā

koi ilzam na duniya mein kisi par rakhna

dil lahu ho bhi to chehre ko gul-e-tar rakhna

KHak ka ho ki ho kanTon ka wo bistar ai dost

nind aa jaegi takiya tu KHuda par rakhna

kya KHabar rah mein kab sath KHushi ka chhuTe

zindagi gham ko bhi sath apne barabar rakhna

dekh aankhon ki zamin hai na laraz jae kahin

ai tasawwur tu yahan panw sanbhal kar rakhna

zanu-e-yar samajh kar use so jaenge

hum gharibon ke sirhane zara patthar rakhna

chahta hai ye mere daur ka dastur 'nasib'

tishnagi dil mein to aankhon mein samundar rakhna