koī kāfir hameñ samjhe ki musalmāñ samjhe
ham to ai ishq tujhe hāsil-e-īmāñ samjhe
lākhoñ masle hue ġhunche nahīñ dekhe ham ne
chand hañste hue phūloñ ko gulistāñ samjhe
ḳhud-ba-ḳhud vaqt pe ho jaate haiñ sāmāñ kyūñkar
kuchh jo samjhe to hameñ be-sar-o-sāmāñ samjhe
dāvat-e-ām hai ik rāh-e-vafā hai maiñ huuñ
vo mire saath chalā aa.e jo āsāñ samjhe
bāġhbāñ kī mire sāhab-nazarī kyā kahnā
phuul gulshan pe hañse aap bahārāñ samjhe
hañs ke mil lete haiñ ahbāb yahī kaafī hai
kis ko fursat ki kisī kā ġham-e-pinhāñ samjhe
ġhuncha-o-gul ke tabassum kī haqīqat kyā hai
pahle kāñToñ se guzar jaa.e to insāñ samjhe
vo zamāne meñ ḳhushī pā nahīñ sakte 'shārib'
āñsuoñ ko jo ilāj-e-ġham-e-daurāñ samjhe
koi kafir hamein samjhe ki musalman samjhe
hum to ai ishq tujhe hasil-e-iman samjhe
lakhon masle hue ghunche nahin dekhe hum ne
chand hanste hue phulon ko gulistan samjhe
KHud-ba-KHud waqt pe ho jate hain saman kyunkar
kuchh jo samjhe to hamein be-sar-o-saman samjhe
dawat-e-am hai ek rah-e-wafa hai main hun
wo mere sath chala aae jo aasan samjhe
baghban ki mere sahab-nazari kya kahna
phul gulshan pe hanse aap bahaaran samjhe
hans ke mil lete hain ahbab yahi kafi hai
kis ko fursat ki kisi ka gham-e-pinhan samjhe
ghuncha-o-gul ke tabassum ki haqiqat kya hai
pahle kanTon se guzar jae to insan samjhe
wo zamane mein KHushi pa nahin sakte 'shaarib'
aansuon ko jo ilaj-e-gham-e-dauran samjhe
Source:
Firdaus-e-Nazar (Pg. 45)
-
Author:
Sultan Haider Khan
-
- Publisher: Urdu Acadami U.P
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.