koi lakh tum se KHafa rahe na kisi ko KHud se juda karo

koī laakh tum se ḳhafā rahe na kisī ko ḳhud se judā karo

yahī zindagī kā usuul hai gale sab se baḌh ke milā karo

kabhī rāz-e-dil na 'ayāñ karo na to ġhair hī kī sunā karo

tumheñ jo bhī kahnā hai shauq se mire paas aa ke kahā karo

mire piiTh pīchhe raqīb se karo yuuñ na raaz kī baat tum

jo gila hai mujh se agar koī mirī baat mujh se kahā karo

baḌī jāñ-fazā hai ye dostī zarā dushmanī kā bhī lutf lo

kabhī dushmanoñ se gale milo kabhī un ke haq meñ du'ā karo

bhalā baat koī ye baat hai ki ho dil meñ kuchh to zabāñ pe kuchh

jo kahā karo vo kiyā karo jo kiyā karo vo kahā karo

koi lakh tum se KHafa rahe na kisi ko KHud se juda karo

yahi zindagi ka usul hai gale sab se baDh ke mila karo

kabhi raaz-e-dil na 'ayan karo na to ghair hi ki suna karo

tumhein jo bhi kahna hai shauq se mere pas aa ke kaha karo

mere piTh pichhe raqib se karo yun na raaz ki baat tum

jo gila hai mujh se agar koi meri baat mujh se kaha karo

baDi jaan-faza hai ye dosti zara dushmani ka bhi lutf lo

kabhi dushmanon se gale milo kabhi un ke haq mein du'a karo

bhala baat koi ye baat hai ki ho dil mein kuchh to zaban pe kuchh

jo kaha karo wo kiya karo jo kiya karo wo kaha karo