koi lahja koi jumla koi chehra nikal aaya

koī lahja koī jumla koī chehrā nikal aayā

purāne taaq ke sāmān se kyā kyā nikal aayā

ba-zāhir ajnabī bastī se jab kuchh der bāteñ kiiñ

yahāñ kī ek ik shai se mirā rishta nikal aayā

mire aañsū hue the jazb jis miTTī meñ ab us par

kahīñ paudā kahīñ sabza kahīñ chashma nikal aayā

ḳhudā ne ek hī miTTī se gūñdhā sab ko ik jaisā

magar ham meñ koī adnā koī a.alā nikal aayā

sabhī se fāsla rakhne kī aadat thī so ab bhī hai

parāyā kaun thā jo shahr meñ apnā nikal aayā

na.e māhaul ne pahchān hī mashkūk kar Daalī

jo be-chehra the kal tak un ke bhī chehrā nikal aayā

koi lahja koi jumla koi chehra nikal aaya

purane taq ke saman se kya kya nikal aaya

ba-zahir ajnabi basti se jab kuchh der baaten kin

yahan ki ek ek shai se mera rishta nikal aaya

mere aansu hue the jazb jis miTTi mein ab us par

kahin pauda kahin sabza kahin chashma nikal aaya

KHuda ne ek hi miTTi se gundha sab ko ek jaisa

magar hum mein koi adna koi aala nikal aaya

sabhi se fasla rakhne ki aadat thi so ab bhi hai

paraya kaun tha jo shahr mein apna nikal aaya

nae mahaul ne pahchan hi mashkuk kar Dali

jo be-chehra the kal tak un ke bhi chehra nikal aaya