koi masruf-e-amal dar pe hai

koī masrūf-e-amal daar pe hai

raushnī mimbar-o-mīnār pe hai

ye chamak sī jo ruḳh-e-yār pe hai

dhuup Thahrī huī dīvār pe hai

merī miTtī huī tahzīb kā aks

mere ghar ke dar-o-dīvār pe hai

kitnī qīmat meñ bikegā īmān

munhasir garmī-e-bāzār pe hai

haar jaane kā sabab hai kuchh aur

bahs TuuTī huī talvār pe hai

aaj jitnā bhī hai dīvār kā bojh

sab kā sab sāya-e-dīvār pe hai

kis qadar bār-e-kifālat 'tāriq'

ek TuuTī huī minqār pe hai

koi masruf-e-amal dar pe hai

raushni mimbar-o-minar pe hai

ye chamak si jo ruKH-e-yar pe hai

dhup Thahri hui diwar pe hai

meri miTti hui tahzib ka aks

mere ghar ke dar-o-diwar pe hai

kitni qimat mein bikega iman

munhasir garmi-e-bazar pe hai

haar jaane ka sabab hai kuchh aur

bahs TuTi hui talwar pe hai

aaj jitna bhi hai diwar ka bojh

sab ka sab saya-e-diwar pe hai

kis qadar bar-e-kifalat 'tariq'

ek TuTi hui minqar pe hai