koi nahin tha hunar-ashna tumhaare baad

koī nahīñ thā hunar-āshnā tumhāre ba.ad

maiñ apne-āp se uljhā rahā tumhāre ba.ad

ye merī āñkheñ baḌī tez raushnī meñ khulīñ

maiñ chāhtā bhī to kyā dekhtā tumhāre ba.ad

har ek baat hai uljhī huī zabān tale

har ek lafz koī bad-duā tumhāre ba.ad

baḌe qarīne se rishte sajā.e the saare

bikhar bikhar gayā har silsila tumhāre ba.ad

to kyā kashish bhī mirī le ga.e tum apne saath

koī to dekhtā chehra mirā tumhāre ba.ad

tumhāre ba.ad ḳhizāñ ho bahār ho kuchh ho

kahāñ rutoñ se mirā sābiqa tumhāre ba.ad

bas ek lamha-e-hijrāñ Thahar gayā mujh meñ

na vāqi.a na koī sāneha tumhāre ba.ad

ye zindagī kā nayā zāviya khulā mujh par

maiñ ḳhud se kitnā qarīb aa gayā tumhāre ba.ad

mire mizāj kī ye be-usūliyāñ chāheñ

tumhāre jaisā koī dūsrā tumhāre ba.ad

vo rañg rañg-e-tabī.at suḳhan-suḳhan 'hāmid'

suno vo shaḳhs kahīñ kho gayā tumhāre ba.ad

koi nahin tha hunar-ashna tumhaare baad

main apne-ap se uljha raha tumhaare baad

ye meri aankhen baDi tez raushni mein khulin

main chahta bhi to kya dekhta tumhaare baad

har ek baat hai uljhi hui zaban tale

har ek lafz koi bad-dua tumhaare baad

baDe qarine se rishte sajae the sare

bikhar bikhar gaya har silsila tumhaare baad

to kya kashish bhi meri le gae tum apne sath

koi to dekhta chehra mera tumhaare baad

tumhaare baad KHizan ho bahaar ho kuchh ho

kahan ruton se mera sabiqa tumhaare baad

bas ek lamha-e-hijran Thahar gaya mujh mein

na waqia na koi saneha tumhaare baad

ye zindagi ka naya zawiya khula mujh par

main KHud se kitna qarib aa gaya tumhaare baad

mere mizaj ki ye be-usuliyan chahen

tumhaare jaisa koi dusra tumhaare baad

wo rang rang-e-tabiat suKHan-suKHan 'hamid'

suno wo shaKHs kahin kho gaya tumhaare baad