koi puchhe na humse kya hua dil

koī pūchhe na ham se kyā huā dil

huā kyā luT gayā dil miT gayā dil

ye kah kar de diyā mujh ko mirā dil

hameñ kosegā degā bad-duā dil

mazā de jā.egī mujh ko tirī aañkh

mazā de jā.egā tujh ko mirā dil

chaman meñ jo khilā gul maiñ ye samjhā

ki hai merā ye murjhāyā huā dil

uThegā lutf sohbat kā abhī to

na.e tum ho na.e ham haiñ nayā dil

kisī se yuuñ daġhā karte nahīñ haiñ

are o be-muravvat bevafā dil

qayāmat hai tumhārī chulbulī shakl

qayāmat hai hamārā chulbulā dil

hamārā dil hamāre kaam kā hai

kahāñ paa.eñ tumhāre kaam kā dil

bahut hai jam ko apne jaam par naaz

zarā laanā mirā TuuTā huā dil

kisī kā zor phir chaltā nahīñ hai

kisī se jab kisī kā mil gayā dil

use kis muñh se kahte ho burā tum

tumheñ kis dil se detā hai duā dil

gayā vo daaġh le kar daaġh de kar

nishānī de gayā dil le gayā dil

hasīñ us ko burā samjhe bachī jaañ

burā ban kar bahut achchhā rahā dil

kaheñ kyā kis ne luuTā kis ko luuTā

luTe ham tum luTā joban luTā dil

vahī achchhā thā us chhātī kī sil se

badal detā kisī but se ḳhudā dil

tumhārī raah meñ vo bhī paḌā hai

zarā dekhe hue TuuTā huā dil

koī ab muft bhī ḳhvāhāñ nahīñ hai

'riyāz' aisā gayā guzrā huā dil

koi puchhe na hum se kya hua dil

hua kya luT gaya dil miT gaya dil

ye kah kar de diya mujh ko mera dil

hamein kosega dega bad-dua dil

maza de jaegi mujh ko teri aankh

maza de jaega tujh ko mera dil

chaman mein jo khila gul main ye samjha

ki hai mera ye murjhaya hua dil

uThega lutf sohbat ka abhi to

nae tum ho nae hum hain naya dil

kisi se yun dagha karte nahin hain

are o be-murawwat bewafa dil

qayamat hai tumhaari chulbuli shakl

qayamat hai hamara chulbula dil

hamara dil hamare kaam ka hai

kahan paen tumhaare kaam ka dil

bahut hai jam ko apne jam par naz

zara lana mera TuTa hua dil

kisi ka zor phir chalta nahin hai

kisi se jab kisi ka mil gaya dil

use kis munh se kahte ho bura tum

tumhein kis dil se deta hai dua dil

gaya wo dagh le kar dagh de kar

nishani de gaya dil le gaya dil

hasin us ko bura samjhe bachi jaan

bura ban kar bahut achchha raha dil

kahen kya kis ne luTa kis ko luTa

luTe hum tum luTa joban luTa dil

wahi achchha tha us chhati ki sil se

badal deta kisi but se KHuda dil

tumhaari rah mein wo bhi paDa hai

zara dekhe hue TuTa hua dil

koi ab muft bhi KHwahan nahin hai

'riyaz' aisa gaya guzra hua dil