koi saya na shajar yaad aaya

koī saaya na shajar yaad aayā

thak ga.e paañv to ghar yaad aayā

khil uThe phuul se sahrāoñ meñ

phir vo firdaus-e-nazar yaad aayā

phir mire paañv meñ zanjīr paḌī

phir tirā hukm-e-safar yaad aayā

lauT jaane ko bahut dil machlā

kyā pas-e-gard-e-safar yaad aayā

saarī ummīdoñ ne dam toḌ diyā

naḳhl-e-be-barg-o-samar yaad aayā

laakh chāhā thā ki vo chashm-e-ġhazāl

phir na yaad aa.e magar yaad aayā

ḳhvāb aur ālam-e-bedārī meñ

ret par ret kā ghar yaad aayā

marsiya din kā likhā thā 'rāshid'

shab ko unvān-e-sahar yaad aayā

koi saya na shajar yaad aaya

thak gae panw to ghar yaad aaya

khil uThe phul se sahraon mein

phir wo firdaus-e-nazar yaad aaya

phir mere panw mein zanjir paDi

phir tera hukm-e-safar yaad aaya

lauT jaane ko bahut dil machla

kya pas-e-gard-e-safar yaad aaya

sari ummidon ne dam toD diya

naKHl-e-be-barg-o-samar yaad aaya

lakh chaha tha ki wo chashm-e-ghazal

phir na yaad aae magar yaad aaya

KHwab aur aalam-e-bedari mein

ret par ret ka ghar yaad aaya

marsiya din ka likha tha 'rashid'

shab ko unwan-e-sahar yaad aaya