koi sazish racho zer-o-zabar ki baat mat socho

koī sāzish racho zer-o-zabar kī baat mat socho

riyā-kāroñ meñ tum apne hunar kī baat mat socho

ye hijrat thī muqaddar lāzmī thā chhūTnā sab kuchh

marāsim rābte ghar aur nagar kī baat mat socho

sabab koī bhī ho lekin lahū taqsīm honā thā

ye sarhad hai idhar tum ho udhar kī baat mat socho

yahī ik koTharī apne liye āñgan hai baiThak hai

agar is shahr meñ jiinā hai ghar kī baat mat socho

tumhāre saare mansūboñ kā nasloñ par ahāta hai

sadā aatī hai umr-e-muḳhtasar kī baat mat socho

mizājoñ par garāñ ho koī lekin rābta rakhnā

yahī tahzīb hai is se mafar kī baat mat socho

ye mumkin hai ḳhizāñ ke ba.ad bhī mausam na raas aa.e

to aisā bhī nahīñ barg-o-samar kī baat mat socho

koi sazish racho zer-o-zabar ki baat mat socho

riya-karon mein tum apne hunar ki baat mat socho

ye hijrat thi muqaddar lazmi tha chhuTna sab kuchh

marasim rabte ghar aur nagar ki baat mat socho

sabab koi bhi ho lekin lahu taqsim hona tha

ye sarhad hai idhar tum ho udhar ki baat mat socho

yahi ek koThari apne liye aangan hai baiThak hai

agar is shahr mein jina hai ghar ki baat mat socho

tumhaare sare mansubon ka naslon par ahata hai

sada aati hai umr-e-muKHtasar ki baat mat socho

mizajon par garan ho koi lekin rabta rakhna

yahi tahzib hai is se mafar ki baat mat socho

ye mumkin hai KHizan ke baad bhi mausam na ras aae

to aisa bhi nahin barg-o-samar ki baat mat socho