koi samjhe to kya samjhe mere gham ke maani bhi

koī samjhe to kyā samjhe mire ġham ke ma'ānī bhī

mire hoñThoñ pe naġhma bhī mirī āñkhoñ meñ paanī bhī

tire chehre se miltī hai mire ash'ār kī rangat

gulābī hai zarā sī aur thoḌī āsmānī bhī

idhar dahshat sī hotī hai shab-e-ġham ke fasānoñ se

udhar achchhī nahīñ lagtī mohabbat kī kahānī bhī

bahut kuchh kah diyā us ne asar-andāz lafzoñ meñ

bahut kuchh kah ga.ī lekin kisī kī be-zabānī bhī

mirā sab haal us se hū-ba-hū jā kar bayāñ karnā

ye jo tahrīr hai ḳhat meñ yahī kahnā zabānī bhī

kabhī maiñ paar kar jā.ūñgā sarhad be-yaqīnī kī

kisī din duur ho jā.egī terī bad-gumānī bhī

baḌī qīmat chukānī paḌ ga.ī shāyad masarrat kī

bahut ġhamgīn sī kyoñ hai tumhārī shādmānī bhī

koi samjhe to kya samjhe mere gham ke ma'ani bhi

mere honThon pe naghma bhi meri aankhon mein pani bhi

tere chehre se milti hai mere ash'ar ki rangat

gulabi hai zara si aur thoDi aasmani bhi

idhar dahshat si hoti hai shab-e-gham ke fasanon se

udhar achchhi nahin lagti mohabbat ki kahani bhi

bahut kuchh kah diya us ne asar-andaz lafzon mein

bahut kuchh kah gai lekin kisi ki be-zabani bhi

mera sab haal us se hu-ba-hu ja kar bayan karna

ye jo tahrir hai KHat mein yahi kahna zabani bhi

kabhi main par kar jaunga sarhad be-yaqini ki

kisi din dur ho jaegi teri bad-gumani bhi

baDi qimat chukani paD gai shayad masarrat ki

bahut ghamgin si kyon hai tumhaari shadmani bhi