koi sawal na koi jawab dil mein hai

koī savāl na koī javāb dil meñ hai

bas ek dard-o-alam kā sahāb dil meñ hai

jarāhateñ jo lagīñ tan pe zeb-e-tan kar liiñ

jo dil ke zaḳhm the un kā hisāb dil meñ hai

agar lahū hai to āñkhoñ meñ kyuuñ nahīñ aatā

ye mauj-e-ḳhūñ hai ki mauj-e-sarāb dil meñ hai

mudām zāhir-o-bātin meñ ye ḳhalīj rahī

nigāh ġharq-e-gunah ehtisāb dil meñ hai

sahīfa-e-alam-e-rozgār hāthoñ meñ

khulī huī tire ġham kī kitāb dil meñ hai

nazar ke sāmne uTTheñge roz-e-hashr magar

vo dil meñ dafn rahegā jo ḳhvāb dil meñ hai

agar jigar meñ ho sāre-jahāñ kā dard to ḳhair

ye kyā ki sāre-jahāñ kā azaab dil meñ hai

koi sawal na koi jawab dil mein hai

bas ek dard-o-alam ka sahab dil mein hai

jarahaten jo lagin tan pe zeb-e-tan kar lin

jo dil ke zaKHm the un ka hisab dil mein hai

agar lahu hai to aankhon mein kyun nahin aata

ye mauj-e-KHun hai ki mauj-e-sarab dil mein hai

mudam zahir-o-baatin mein ye KHalij rahi

nigah gharq-e-gunah ehtisab dil mein hai

sahifa-e-alam-e-rozgar hathon mein

khuli hui tere gham ki kitab dil mein hai

nazar ke samne uTThenge roz-e-hashr magar

wo dil mein dafn rahega jo KHwab dil mein hai

agar jigar mein ho sare-jahan ka dard to KHair

ye kya ki sare-jahan ka azab dil mein hai