koi shikwa na shikayat hai bichhaDne wale

koī shikva na shikāyat hai bichhaḌne vaale

bevafā.ī tirī aadat hai bichhaḌne vaale

ham jo zinda haiñ to zinda bhī nahīñ haiñ dekho

ik bapā roz qayāmat hai bichhaḌne vaale

merī sāñsoñ kī ravānī kā sabab pūchhte ho

tere chehre kī tilāvat hai bichhaḌne vaale

chain tum ko jo nahīñ aatā kisī bhī lamhe

ye mohabbat kī alāmat hai bichhaḌne vaale

mujh ko kirdār mayassar nahīñ afsāne meñ

ye kahānī meñ qabāhat hai bichhaḌne vaale

tū jo bichhḌā hai ise saath hī le jaanā thā

dil ki terī hī amānat hai bichhaḌne vaale

apnā ushshāq-qabīle se ta.alluq gahrā

ġham kī jāgīr virāsat hai bichhaḌne vaale

merā da.avā thā bichhaḌ kar na jiyūñgā lekin

ab jo zinda huuñ nadāmat hai bichhaḌne vaale

qalb-e-shāhī pe jo chaltā hai to sikka terā

dil pe terī hī hukūmat hai bichhaḌne vaale

koi shikwa na shikayat hai bichhaDne wale

bewafai teri aadat hai bichhaDne wale

hum jo zinda hain to zinda bhi nahin hain dekho

ek bapa roz qayamat hai bichhaDne wale

meri sanson ki rawani ka sabab puchhte ho

tere chehre ki tilawat hai bichhaDne wale

chain tum ko jo nahin aata kisi bhi lamhe

ye mohabbat ki alamat hai bichhaDne wale

mujh ko kirdar mayassar nahin afsane mein

ye kahani mein qabahat hai bichhaDne wale

tu jo bichhDa hai ise sath hi le jaana tha

dil ki teri hi amanat hai bichhaDne wale

apna ushshaq-qabile se talluq gahra

gham ki jagir wirasat hai bichhaDne wale

mera dawa tha bichhaD kar na jiyunga lekin

ab jo zinda hun nadamat hai bichhaDne wale

qalb-e-shahi pe jo chalta hai to sikka tera

dil pe teri hi hukumat hai bichhaDne wale