koi tanz mat kar hamari thakan par

koī tanz mat kar hamārī thakan par

yahī qaum hai mar-miTī jo vatan par

kisī kaam kā jab rahā hī nahīñ to

chalo fātiha paḌh leñ sansad bhavan par

na ho ḳhūbsūrat na ḳhushbū bikhere

ye kaisī hai bandish gulāb-o-saman par

zarā bolnā phir zarā sā tavaqquf

ye lahja saje hai tire bāñkpan par

mujhe lag rahā thā use ranj hogā

shikan tak na aa.ī thī va.ada-shikan par

the mahfil meñ vaise to chehre bahut par

sabhī kī nazar thī hamāre sajan par

hai itnī hasīñ vo parī-zād haa.e

sitāre kareñ raqs us ke badan par

jo bhī mar ga.e hoñ vabā ke sitam se

likho ma.azarat ḳhuuñ se un ke kafan par

mire jism kī ḳhaak se khil ga.e gul

ye ehsān 'tausīf' kā hai chaman par

koi tanz mat kar hamari thakan par

yahi qaum hai mar-miTi jo watan par

kisi kaam ka jab raha hi nahin to

chalo fatiha paDh len sansad bhawan par

na ho KHubsurat na KHushbu bikhere

ye kaisi hai bandish gulab-o-saman par

zara bolna phir zara sa tawaqquf

ye lahja saje hai tere bankpan par

mujhe lag raha tha use ranj hoga

shikan tak na aai thi wada-shikan par

the mahfil mein waise to chehre bahut par

sabhi ki nazar thi hamare sajan par

hai itni hasin wo pari-zad hae

sitare karen raqs us ke badan par

jo bhi mar gae hon waba ke sitam se

likho mazarat KHun se un ke kafan par

mere jism ki KHak se khil gae gul

ye ehsan 'tausif' ka hai chaman par