koi to tha dhanak dhanak KHwab mein ya KHayal mein

koī to thā dhanak dhanak ḳhvāb meñ yā ḳhayāl meñ

rañg 'ajīb ghul ga.e kaifiyyat-e-malāl meñ

mohr thī mire nutq par tere laboñ kī naġhmagī

varna javāb the chhupe tere har ik savāl meñ

bol tū soch soch kar chal tū sambhal sambhal ke chal

kī hai bahut gulo kī baat ham ne tirī misāl meñ

sard dinoñ kī tarah gum ho ga.ī apnī zindagī

farq kahāñ rahā koī maah meñ aur saal meñ

mere rivāq-e-dil meñ tū chaltā thā kitne naaz se

aa ga.ī kaise ab lachak terī sabā sī chaal meñ

mere firāq meñ tirī 'umr Thahar ga.ī thī kyā

baal safed ho ga.e mere tire ḳhayāl meñ

mausam-e-tāza ho kabhī merī taraf bhī ik nazar

utre koī nayā parind mere ġhamoñ ke taal meñ

apne kināra kar na ab 'bāqar'-e-ḳhush-misāl se

be-hunarī sharīk thī us kī tire kamāl meñ

koi to tha dhanak dhanak KHwab mein ya KHayal mein

rang 'ajib ghul gae kaifiyyat-e-malal mein

mohr thi mere nutq par tere labon ki naghmagi

warna jawab the chhupe tere har ek sawal mein

bol tu soch soch kar chal tu sambhal sambhal ke chal

ki hai bahut gulo ki baat hum ne teri misal mein

sard dinon ki tarah gum ho gai apni zindagi

farq kahan raha koi mah mein aur sal mein

mere riwaq-e-dil mein tu chalta tha kitne naz se

aa gai kaise ab lachak teri saba si chaal mein

mere firaq mein teri 'umr Thahar gai thi kya

baal safed ho gae mere tere KHayal mein

mausam-e-taza ho kabhi meri taraf bhi ek nazar

utre koi naya parind mere ghamon ke tal mein

apne kinara kar na ab 'baqar'-e-KHush-misal se

be-hunari sharik thi us ki tere kamal mein