koi wahshi chiz si zanjir-e-pa jaise hawa

koī vahshī chiiz sī zanjīr-e-pā jaise havā

duur tak lekin safar kā silsila jaise havā

band kamre meñ parāganda ḳhayāloñ kī ghuTan

aur darvāze pe ik āvāz-e-pā jaise havā

girtī dīvāroñ ke nīche saa.e jaise aadmī

tañg galiyoñ meñ faqat aks-e-havā jaise havā

āsmāñ-tā-āsmāñ sunsān sannāTe kī jhiil

dā.era-dar-dā.era merī navā jaise havā

do larazte haath jaise saaya phailā.e shajar

kāñpte hoñToñ pe ik harf-e-duā jaise havā

pāniyoñ meñ Dūbtī jaise rutoñ kī kashtiyāñ

sāhiloñ par chīḳhtī koī sadā jaise havā

kitnā ḳhālī hai ye dāman jis tarah dāmān-e-dasht

kuchh na kuchh to de use mere ḳhudā jaise havā

koi wahshi chiz si zanjir-e-pa jaise hawa

dur tak lekin safar ka silsila jaise hawa

band kamre mein paraganda KHayalon ki ghuTan

aur darwaze pe ek aawaz-e-pa jaise hawa

girti diwaron ke niche sae jaise aadmi

tang galiyon mein faqat aks-e-hawa jaise hawa

aasman-ta-asman sunsan sannaTe ki jhil

daera-dar-daera meri nawa jaise hawa

do larazte hath jaise saya phailae shajar

kanpte honTon pe ek harf-e-dua jaise hawa

paniyon mein Dubti jaise ruton ki kashtiyan

sahilon par chiKHti koi sada jaise hawa

kitna KHali hai ye daman jis tarah daman-e-dasht

kuchh na kuchh to de use mere KHuda jaise hawa