kore kaghaz pe kai naqsh banae maine

kore kāġhaz pe ka.ī naqsh banā.e maiñ ne

aur phir ik ke sivā saare miTā.e maiñ ne

gul-e-ḳhud-rau kī mahak jaise kisī jangal meñ

haa.e vo giit jo tanhā.ī meñ gaa.e maiñ ne

chaman-e-fan meñ raheñge jo hamesha shādāb

aise gul-būTe bhī chand ek ugaa.e maiñ ne

ḳhuun insān kā paanī kī tarah bah niklā

uf ta.assub ke vo hangāme uThā.e maiñ ne

apnoñ se baḌh ke madad-gār-o-muāvin jo the

dahr meñ aise bhī dekhe haiñ parā.e maiñ ne

haa.e kyā chiiz thī ai rāh-e-mohabbat tū bhī

kāñTe jitne the vo palkoñ se uThā.e maiñ ne

husn ke saiñkaḌoñ ruḳh tum se abhī maḳhfī haiñ

husn ke ruup hazāroñ hī dikhā.e maiñ ne

ek bhī terī nazar se nahīñ guzrā ai dost

kitne aivān taḳhayyul ke sajā.e maiñ ne

shā.erī bas meñ mire aa.e to jānūñ 'maġhmūm

umr-bhar is ke bahut naaz uThā.e maiñ ne

kore kaghaz pe kai naqsh banae main ne

aur phir ek ke siwa sare miTae main ne

gul-e-KHud-rau ki mahak jaise kisi jangal mein

hae wo git jo tanhai mein gae main ne

chaman-e-fan mein rahenge jo hamesha shadab

aise gul-buTe bhi chand ek ugae main ne

KHun insan ka pani ki tarah bah nikla

uf tassub ke wo hangame uThae main ne

apnon se baDh ke madad-gar-o-muawin jo the

dahr mein aise bhi dekhe hain parae main ne

hae kya chiz thi ai rah-e-mohabbat tu bhi

kanTe jitne the wo palkon se uThae main ne

husn ke sainkaDon ruKH tum se abhi maKHfi hain

husn ke rup hazaron hi dikhae main ne

ek bhi teri nazar se nahin guzra ai dost

kitne aiwan taKHayyul ke sajae main ne

shaeri bas mein mere aae to jaanun 'maghmum

umr-bhar is ke bahut naz uThae main ne