koshish-e-zabt nahin ai dil-e-nashad nahin

koshish-e-zabt nahīñ ai dil-e-nāshād nahīñ

iltijā apnī hadoñ meñ ho to fariyād nahīñ

qissa-e-dard kisī aur kī rūdād nahīñ

ek merī hī ġhazal hai jo mujhe yaad nahīñ

choT khā kar bhī laboñ par mire fariyād nahīñ

aur kyā hai jo ye taufīq-e-ḳhudā-dād nahīñ

tum kabhī pursish-e-hālāt kī zahmat to karo

kaun sī baat hai aisī jo mujhe yaad nahīñ

kis qadar tuul thī mī.ād-e-asīrī tauba

ab bhī ye vahm sā hotā hai ki āzād nahīñ

tū ne kis ke liye kāñToñ ko sajāyā tū jaan

maiñ ne kyoñ phuul chune the ye mujhe yaad nahīñ

yuuñ to har rang meñ hai tere karam kī tārīḳh

qābil-e-zikr koī baat mujhe yaad nahīñ

apne hī saa.e meñ guzrā huuñ har ik daur se maiñ

tum mire saath kahāñ tak the mujhe yaad nahīñ

rāt-din sarf-e-ibādat to nahīñ hai 'anjum'

lekin un meñ bhī nahīñ jin ko ḳhudā yaad nahīñ

koshish-e-zabt nahin ai dil-e-nashad nahin

iltija apni hadon mein ho to fariyaad nahin

qissa-e-dard kisi aur ki rudad nahin

ek meri hi ghazal hai jo mujhe yaad nahin

choT kha kar bhi labon par mere fariyaad nahin

aur kya hai jo ye taufiq-e-KHuda-dad nahin

tum kabhi pursish-e-haalat ki zahmat to karo

kaun si baat hai aisi jo mujhe yaad nahin

kis qadar tul thi miad-e-asiri tauba

ab bhi ye wahm sa hota hai ki aazad nahin

tu ne kis ke liye kanTon ko sajaya tu jaan

main ne kyon phul chune the ye mujhe yaad nahin

yun to har rang mein hai tere karam ki tariKH

qabil-e-zikr koi baat mujhe yaad nahin

apne hi sae mein guzra hun har ek daur se main

tum mere sath kahan tak the mujhe yaad nahin

raat-din sarf-e-ibaadat to nahin hai 'anjum'

lekin un mein bhi nahin jin ko KHuda yaad nahin