kuchh aise mahfil mein apni jaanib sabhi ka wo dhyan khinchta hai

kuchh aise mahfil meñ apnī jānib sabhī kā vo dhyān khīñchtā hai

binā ijāzat ke jaise jismoñ se ik malak jaan khīñchtā hai

vo aur hoñge haiñ jin kī āñkhoñ meñ ḳhvāb āzād āsmāñ ke

ham apnī zanjīr ḳhud banāte haiñ ham ko zindān khīñchtā hai

vajūd apnā ḳhayāl hai to adam hai apnī ḳhayālī manzil

dalīl hone kī jab nahīñ hai to kaisā imkān khīñchtā hai

hamārī marzī kī raah hai ye hameñ ḳhabar hai ki is safar meñ

kisī ko dār-o-rasan pe shikva kisī ko irfān khīñchtā hai

hasīn manzar hamesha hadd-e-nazar se bāhar rahe haiñ mere

maiñ rā.egānī ko jī rahā huuñ mujhe bayābān khīñchtā hai

ik-ādh kāfir bhī mujh ko 'jānī' mile haiñ sehn-e-haram meñ aa kar

ik-ādh aise mile jinheñ but-kade meñ īmān khīñchtā hai

kuchh aise mahfil mein apni jaanib sabhi ka wo dhyan khinchta hai

bina ijazat ke jaise jismon se ek malak jaan khinchta hai

wo aur honge hain jin ki aankhon mein KHwab aazad aasman ke

hum apni zanjir KHud banate hain hum ko zindan khinchta hai

wajud apna KHayal hai to adam hai apni KHayali manzil

dalil hone ki jab nahin hai to kaisa imkan khinchta hai

hamari marzi ki rah hai ye hamein KHabar hai ki is safar mein

kisi ko dar-o-rasan pe shikwa kisi ko irfan khinchta hai

hasin manzar hamesha hadd-e-nazar se bahar rahe hain mere

main raegani ko ji raha hun mujhe bayaban khinchta hai

ik-adh kafir bhi mujh ko 'jaani' mile hain sehn-e-haram mein aa kar

ik-adh aise mile jinhen but-kade mein iman khinchta hai