kuchh ajab baat teri jalwa-numai mein hai

kuchh 'ajab baat tirī jalva-numā.ī meñ hai

qaid meñ lutf-e-sukūñ ranj rihā.ī meñ hai

merī taqdīr ke sab taare jahāñ milte haiñ

un kī tasvīr tire dast-e-hinā.ī meñ hai

chāñd tāroñ se kaho raushnī vāpas le leñ

shams-e-tabrez mirī dast-e-rasā.ī meñ hai

jalva-gāh-e-ruḳh-e-'ālam se hameñ kab inkār

par faqat tū hī mirā saarī ḳhudā.ī meñ hai

halqa-e-shams-o-qamar maañg rahe shām-o-sahar

ek kangan jo tirī bā.īñ kalā.ī meñ hai

maiñ ne tujh ko to ḳhatāvār na samjhā thā magar

shak kā pahlū tirī is darja safā.ī meñ hai

kuchh 'ajab baat teri jalwa-numai mein hai

qaid mein lutf-e-sukun ranj rihai mein hai

meri taqdir ke sab tare jahan milte hain

un ki taswir tere dast-e-hinai mein hai

chand taron se kaho raushni wapas le len

shams-e-tabrez meri dast-e-rasai mein hai

jalwa-gah-e-ruKH-e-'alam se hamein kab inkar

par faqat tu hi mera sari KHudai mein hai

halqa-e-shams-o-qamar mang rahe sham-o-sahar

ek kangan jo teri bain kalai mein hai

main ne tujh ko to KHatawar na samjha tha magar

shak ka pahlu teri is darja safai mein hai