kuchh aql bhi rakhta hai junun-zad hamara

kuchh aql bhī rakhtā hai junūñ-zād hamārā

ab ishq meñ pāgal nahīñ farhād hamārā

ḳhemoñ se ubharne lagīñ mātam kī sadā.eñ

aur ham se ḳhafā ho gayā sajjād hamārā

ik phuul ke khilne se bahut pahle jahāñ meñ

ik ḳhvāb huā jaatā hai barbād hamārā

ik soch ki mahdūd hī rahtī hai rahegī

ik dil kā parinda hai ki āzād hamārā

ye bazm-e-suḳhan sāz-e-suḳhan hī kī tag-o-tāz

suntā hai yahāñ har koī irshād hamārā

ye talḳhī-e-qismat hai ki sāñsoñ kī atā hai

aahoñ se bhare dāman-e-fariyād hamārā

ham qāfiya-paimā nahīñ shā.ir hue 'hassān'

aur mīr-taqī-'mīr' hai ustād hamārā

kuchh aql bhi rakhta hai junun-zad hamara

ab ishq mein pagal nahin farhad hamara

KHemon se ubharne lagin matam ki sadaen

aur hum se KHafa ho gaya sajjad hamara

ek phul ke khilne se bahut pahle jahan mein

ek KHwab hua jata hai barbaad hamara

ek soch ki mahdud hi rahti hai rahegi

ek dil ka parinda hai ki aazad hamara

ye bazm-e-suKHan saz-e-suKHan hi ki tag-o-taz

sunta hai yahan har koi irshad hamara

ye talKHi-e-qismat hai ki sanson ki ata hai

aahon se bhare daman-e-fariyaad hamara

hum qafiya-paima nahin shair hue 'hassan'

aur mir-taqi-'mir' hai ustad hamara