kuchh aur nazar aate KHud se jo Dare hote

kuchh aur nazar aate ḳhud se jo Dare hote

saa.e meñ kahīñ hote kuchh zaḳhm bhare hote

duniyā kā jo bas chaltā rakh detī kuchal kar hī

phir ye bhī haqīqat hai ham kitnā pare hote

lagtīñ na kisī ko bhī bāteñ ye burī apnī

do-chār jo ham aise kuchh aur khare hote

andar se sabhī shāyad āvāz ke ghāyal haiñ

āvāz na dete to kyuuñ zaḳhm hare hote

ho koī bhī ham sab kā muñh band na kar dete

ilzām agar sar pe ḳhud hī na dhare hote

kuchh dekh ke jī apnā hotā jo zarā bhī ḳhush

phir haath in āñkhoñ pe aise na dhare hote

kuchh jānñe kī dhun hai kyā jānñā hai lekin

mā'lūm ye hotā to ḳhud se na pare hote

ye 'talḳh' kiyā kyā hai ḳhud se bhī ga.e tum to

marnā hī kisī par thā tum ḳhud pe mare hote

kuchh aur nazar aate KHud se jo Dare hote

sae mein kahin hote kuchh zaKHm bhare hote

duniya ka jo bas chalta rakh deti kuchal kar hi

phir ye bhi haqiqat hai hum kitna pare hote

lagtin na kisi ko bhi baaten ye buri apni

do-chaar jo hum aise kuchh aur khare hote

andar se sabhi shayad aawaz ke ghayal hain

aawaz na dete to kyun zaKHm hare hote

ho koi bhi hum sab ka munh band na kar dete

ilzam agar sar pe KHud hi na dhare hote

kuchh dekh ke ji apna hota jo zara bhi KHush

phir hath in aankhon pe aise na dhare hote

kuchh jaanne ki dhun hai kya jaanna hai lekin

ma'lum ye hota to KHud se na pare hote

ye 'talKH' kiya kya hai KHud se bhi gae tum to

marna hi kisi par tha tum KHud pe mare hote