kuchh bhi ayan nihan na tha koi zaman makan na tha

kuchh bhī ayaañ nihāñ na thā koī zamāñ makāñ na thā

der thī ik nigāh kī phir ye jahāñ jahāñ na thā

saaz vo qatre qatre meñ soz vo zarre zarre meñ

yaad tirī kise na thī dard tirā kahāñ na thā

ishq kī āzmā.isheñ aur fazāoñ meñ huiiñ

paañv tale zamīñ na thī sar pe ye āsmāñ na thā

ishq harīm-e-husn meñ apne sahāre rah gayā

sabr kā bhī pata na thā hosh kā bhī nishāñ na thā

ek ko ek kī ḳhabar manzil-e-ishq meñ na thī

koī bhī ahl-e-kārvāñ shāmil-e-kārvāñ na thā

ishq ne apnī jaan ko rog ka.ī lagā liye

hijr-o-visāl umīd-o-bīm kaun balā-e-jāñ na thā

ḳhalvatiyān-e-rāz se hāl-e-visāl-e-yār pūchh

husn bhī be-naqāb thā ishq bhī darmiyāñ na thā

daur-e-hayāt mahz thā is ke harīm-e-rāz meñ

kaif-o-asar kā zikr kyā ziist kā bhī nishāñ na thā

shikva-e-dar-guzar kyuuñ hai ki husn ishq se

itnā to bad-gumāñ na thā itnā to sar-garāñ na thā

kuchh bhi ayan nihan na tha koi zaman makan na tha

der thi ek nigah ki phir ye jahan jahan na tha

saz wo qatre qatre mein soz wo zarre zarre mein

yaad teri kise na thi dard tera kahan na tha

ishq ki aazmaishen aur fazaon mein huin

panw tale zamin na thi sar pe ye aasman na tha

ishq harim-e-husn mein apne sahaare rah gaya

sabr ka bhi pata na tha hosh ka bhi nishan na tha

ek ko ek ki KHabar manzil-e-ishq mein na thi

koi bhi ahl-e-karwan shamil-e-karwan na tha

ishq ne apni jaan ko rog kai laga liye

hijr-o-visal umid-o-bim kaun bala-e-jaan na tha

KHalwatiyan-e-raaz se haal-e-visal-e-yar puchh

husn bhi be-naqab tha ishq bhi darmiyan na tha

daur-e-hayat mahz tha is ke harim-e-raaz mein

kaif-o-asar ka zikr kya zist ka bhi nishan na tha

shikwa-e-dar-guzar kyun hai ki husn ishq se

itna to bad-guman na tha itna to sar-garan na tha