kuchh bhi kar sakta nahin tadbir se

kuchh bhī kar saktā nahīñ tadbīr se

aadmī majbūr hai taqdīr se

TukḌe kyoñ karte ho dil shamshīr se

toḌo ye shīsha nigah ke tiir se

jam sakī rangat na bazm-e-ġhair meñ

ukhḌī ukhḌī aap kī taqrīr se

āshiqoñ par zulm karne ke sivā

aur kyā aatā hai charḳh-e-pīr se

kyoñ murīd-e-ishq ai vahshat na huuñ

silsila miltā hai ye zanjīr se

lo tavāzo kā kamānoñ se sabaq

raah karnā dil meñ sīkho tiir se

qābil-e-teġh-e-adā kyā ham nahīñ

kāTte ho kyoñ galā shamshīr se

ye tamanna hai ki dekhā hī karūñ

jī bahaltā hai tirī tasvīr se

hai ye naqsha chaar din ke hijr meñ

shakl ab miltī nahīñ tasvīr se

le ke dil un kī dilerī dekhiye

kaise aa baiThe haiñ be-taqsīr se

vasl kī shab meñ bhī uljhan hī rahī

aap kī uljhī huī taqdīr se

zabt kab tak ek din āḳhir tujhe

khīñch leñge aah kī tāsīr se

aaj fikr-e-ġhair meñ jaatā thā maiñ

mil ga.e vo ḳhūbī-e-taqdīr se

aaḌ meñ un kī falak bach bach gayā

varna dabte haiñ javāñ kab piir se

e'tirāzoñ par tule haiñ kyoñ harīf

'bazm' kyā hāsil hai is taqdīr se

maiñ to dil-dāda fasāhat kā huuñ 'bazm'

kyoñ na ho ulfat kalām-e-'mīr' se

kuchh bhi kar sakta nahin tadbir se

aadmi majbur hai taqdir se

TukDe kyon karte ho dil shamshir se

toDo ye shisha nigah ke tir se

jam saki rangat na bazm-e-ghair mein

ukhDi ukhDi aap ki taqrir se

aashiqon par zulm karne ke siwa

aur kya aata hai charKH-e-pir se

kyon murid-e-ishq ai wahshat na hun

silsila milta hai ye zanjir se

lo tawazo ka kamanon se sabaq

rah karna dil mein sikho tir se

qabil-e-tegh-e-ada kya hum nahin

kaTte ho kyon gala shamshir se

ye tamanna hai ki dekha hi karun

ji bahalta hai teri taswir se

hai ye naqsha chaar din ke hijr mein

shakl ab milti nahin taswir se

le ke dil un ki dileri dekhiye

kaise aa baiThe hain be-taqsir se

wasl ki shab mein bhi uljhan hi rahi

aap ki uljhi hui taqdir se

zabt kab tak ek din aaKHir tujhe

khinch lenge aah ki tasir se

aaj fikr-e-ghair mein jata tha main

mil gae wo KHubi-e-taqdir se

aaD mein un ki falak bach bach gaya

warna dabte hain jawan kab pir se

e'tiraazon par tule hain kyon harif

'bazm' kya hasil hai is taqdir se

main to dil-dada fasahat ka hun 'bazm'

kyon na ho ulfat kalam-e-'mir' se