kuchh bhi nahin hai pas mere ab siwae yaad

kuchh bhī nahīñ hai paas mire ab sivā.e yaad

sho.ala sā jal rahā hai dar-e-dil matā.a-e-yād

tanhā.iyoñ meñ bhī kabhī tanhā nahīñ huuñ maiñ

aa baiThtī hai paas mire bin-bulā.e yaad

shab-bhar maiñ lutf letā rahā huuñ isī tarah

saarī hī raat chaltī rahī hai havā-e-yād

aise bichhaḌ ki dil meñ koī baat rah na jaa.e

kyā jāniye ki phir kabhī aa.e na aa.e yaad

thak haar ke vo mere hī pahlū meñ so.egī

din bhar jo maarī maarī phirī saa.e saa.e yaad

kyā haal kar liyā hai zarā hāl-e-dil kaho

pahle to tum nahīñ the kabhī mubtalā-e-yād

maiñ kar to lūñgā tark-e-mohabbat magar 'yashab'

mumkin nahīñ ki us kī mire dil se jaa.e yaad

kuchh bhi nahin hai pas mere ab siwae yaad

shoala sa jal raha hai dar-e-dil mataa-e-yaad

tanhaiyon mein bhi kabhi tanha nahin hun main

aa baiThti hai pas mere bin-bulae yaad

shab-bhar main lutf leta raha hun isi tarah

sari hi raat chalti rahi hai hawa-e-yaad

aise bichhaD ki dil mein koi baat rah na jae

kya jaaniye ki phir kabhi aae na aae yaad

thak haar ke wo mere hi pahlu mein soegi

din bhar jo mari mari phiri sae sae yaad

kya haal kar liya hai zara haal-e-dil kaho

pahle to tum nahin the kabhi mubtala-e-yaad

main kar to lunga tark-e-mohabbat magar 'yashab'

mumkin nahin ki us ki mere dil se jae yaad