kuchh gham nahin ki ghar ki ye angnai kam hui

kuchh ġham nahīñ ki ghar kī ye añgnā.ī kam huī

dīvār khīñchne se shanāsā.ī kam huī

tujh se bichhaḌ ke aaj bhī zinda to haiñ magar

mahsūs har qadam pe tavānā.ī kam huī

har manzar-e-hayāt pe be-chehragī sī hai

tārīkiyāñ baḌhī haiñ ki bīnā.ī kam huī

shānoñ pe āsmān samundar hai paañv meñ

ūñchā.iyāñ ghaTī haiñ ki gahrā.ī kam huī

ham dostoñ kī tarah rahe saath umr bhar

ye bhī nahīñ ki ma.arka-ārā.ī kam huī

majbūriyoñ ne maslahat-andesh kar diyā

ye kyoñ kaheñ ki hausla-afzā.ī kam huī

tanhā.iyoñ meñ sab the mire mo'tarif magar

mahfil meñ aa gayā to pazīrā.ī kam huī

kuchh gham nahin ki ghar ki ye angnai kam hui

diwar khinchne se shanasai kam hui

tujh se bichhaD ke aaj bhi zinda to hain magar

mahsus har qadam pe tawanai kam hui

har manzar-e-hayat pe be-chehragi si hai

tarikiyan baDhi hain ki binai kam hui

shanon pe aasman samundar hai panw mein

unchaiyan ghaTi hain ki gahrai kam hui

hum doston ki tarah rahe sath umr bhar

ye bhi nahin ki marka-arai kam hui

majburiyon ne maslahat-andesh kar diya

ye kyon kahen ki hausla-afzai kam hui

tanhaiyon mein sab the mere mo'tarif magar

mahfil mein aa gaya to pazirai kam hui