kuchh gharaz hum ko nahin hai ki kahan le jae

kuchh ġharaz ham ko nahīñ hai ki kahāñ le jaa.e

chal diye bas dil-e-dīvāna jahāñ le jaa.e

vo galī ḳhuld se behtar hai bas itnā sun kar

koī vāqif ho to ham ko bhī vahāñ le jaa.e

merī āvāz huī jaatī hai us kī āvāz

ab hai kyā duur ki us tak ye fuġhāñ le jaa.e

mauj-e-sarkash ko ḳhabar-dār kiyā thā ham ne

us ko jaanā thā jahāñ jū-e-ravāñ le jaa.e

gul nahīñ deñge kabhī bulbul-e-muhtāj ko zar

ḳhvāh sarmāya ye sab bād-e-ḳhizāñ le jaa.e

ishq meñ us ke bas ik jaan hai baaqī ye bhī

dekhiye kab ġhazab-e-ham-vatanāñ le jaa.e

merī bāteñ hī ḳhush aatī haiñ use jaise koī

kar ke ātish nazar-andāz dhuāñ le jaa.e

kuchh gharaz hum ko nahin hai ki kahan le jae

chal diye bas dil-e-diwana jahan le jae

wo gali KHuld se behtar hai bas itna sun kar

koi waqif ho to hum ko bhi wahan le jae

meri aawaz hui jati hai us ki aawaz

ab hai kya dur ki us tak ye fughan le jae

mauj-e-sarkash ko KHabar-dar kiya tha hum ne

us ko jaana tha jahan ju-e-rawan le jae

gul nahin denge kabhi bulbul-e-muhtaj ko zar

KHwah sarmaya ye sab baad-e-KHizan le jae

ishq mein us ke bas ek jaan hai baqi ye bhi

dekhiye kab ghazab-e-ham-watanan le jae

meri baaten hi KHush aati hain use jaise koi

kar ke aatish nazar-andaz dhuan le jae