kuchh ghuncha-labon ki yaad aai kuchh gul-badanon ki yaad aai

kuchh ġhuncha-laboñ kī yaad aa.ī kuchh gul-badanoñ kī yaad aa.ī

jo aañkh jhapakte biit ga.iiñ un anjumanoñ kī yaad aa.ī

majrūh guloñ ke dāman meñ paivand lage haiñ ḳhushbū ke

dekhā jo bahāroñ kā ye chalan sunsān banoñ kī yaad aa.ī

thī hosh-o-ḳhirad se kis ko ġharaz arbāb-e-junūñ ke halqe meñ

jab fasl-e-bahārāñ chīḳh uThī tab pairahnoñ kī yaad aa.ī

kyā kam hai karam ye apnoñ kā pahchānñe vaalā koī nahīñ

jo des meñ bhī pardesī haiñ un ham-vatanoñ kī yaad aa.ī

shīrīñ kī adāoñ par maa.il parvez kī satvat se ḳhā.if

jo ban na sake farhād kabhī un tesha-zanoñ kī yaad aa.ī

chhāyā hai 'qatīl' aksar dil par nādīda nazāroñ kā jaadū

ham bādiya-paimā the lekin phir bhī chamanoñ kī yaad aa.ī

kuchh ghuncha-labon ki yaad aai kuchh gul-badanon ki yaad aai

jo aankh jhapakte bit gain un anjumanon ki yaad aai

majruh gulon ke daman mein paiwand lage hain KHushbu ke

dekha jo bahaaron ka ye chalan sunsan banon ki yaad aai

thi hosh-o-KHirad se kis ko gharaz arbab-e-junun ke halqe mein

jab fasl-e-bahaaran chiKH uThi tab pairahnon ki yaad aai

kya kam hai karam ye apnon ka pahchanne wala koi nahin

jo des mein bhi pardesi hain un ham-watanon ki yaad aai

shirin ki adaon par mail parwez ki satwat se KHaif

jo ban na sake farhad kabhi un tesha-zanon ki yaad aai

chhaya hai 'qatil' aksar dil par nadida nazaron ka jadu

hum baadiya-paima the lekin phir bhi chamanon ki yaad aai