kuchh harj nahin jam jo begana lage hai

kuchh harj nahīñ jaam jo begāna lage hai

rindoñ se ḳhafā sāqi-e-mai-ḳhāna lage hai

us shaam kī tauqīr ko āshiq se hī pūchho

ye husn use sub.h-e-sanam-ḳhāna lage hai

dekhe hai ruḳh-e-jānāñ pe jab zulf-e-pareshāñ

is daur kā farzāna bhī dīvāna lage hai

ik maiñ hī nahīñ lagtā tire pyaar kā maarā

har shaḳhs tire pyaar kā dīvāna lage hai

dekhā hai mujhe jab bhī kahā ahl-e-ḳhirad ne

dil merā kisī sham.a kā parvāna lage hai

mahfil se mire zikr pe chal dete haiñ uTh kar

ye tarz-e-amal un kā raqībāna lage hai

is husn kī mahfil ke har andāz se yaaro

'ādil' hī hameñ bānī-e-afsāna lage hai

kuchh harj nahin jam jo begana lage hai

rindon se KHafa saqi-e-mai-KHana lage hai

us sham ki tauqir ko aashiq se hi puchho

ye husn use subh-e-sanam-KHana lage hai

dekhe hai ruKH-e-jaanan pe jab zulf-e-pareshan

is daur ka farzana bhi diwana lage hai

ek main hi nahin lagta tere pyar ka mara

har shaKHs tere pyar ka diwana lage hai

dekha hai mujhe jab bhi kaha ahl-e-KHirad ne

dil mera kisi shama ka parwana lage hai

mahfil se mere zikr pe chal dete hain uTh kar

ye tarz-e-amal un ka raqibana lage hai

is husn ki mahfil ke har andaz se yaro

'adil' hi hamein bani-e-afsana lage hai