kuchh hina se nahin hai us kaf-e-pa ki KHubi

kuchh hinā se nahīñ hai us kaf-e-pā kī ḳhūbī

balki hai us kaf-e-pā hī se hinā kī ḳhūbī

zeb-tan us ke huī ye hai qabā kī ḳhūbī

nik.hat-e-zulf kā laanā hai sabā kī ḳhūbī

misl-e-ā.īna ke zāhir meñ safā haiñ to kyā

ahl-e-ālam meñ hai bātin kī safā kī ḳhūbī

ustuḳhvāñ-reza pe kartā hai qanā.at jo vo

us se hai saare tuyūroñ meñ humā kī ḳhūbī

jānvar hai na ho insān meñ gar sharm-o-hayā

kyoñ hai insāñ meñ faqat sharm-o-hayā kī ḳhūbī

ḳhūbī-e-ahl-e-duval daulat-o-hashmat se nahīñ

mutavāze ho yahī hai umarā kī ḳhūbī

sehat-o-āfiyat-o-farhat-e-rizq-o-īmāñ

aish baḳhshī tujhe hai sab ye ḳhudā kī ḳhūbī

kuchh hina se nahin hai us kaf-e-pa ki KHubi

balki hai us kaf-e-pa hi se hina ki KHubi

zeb-tan us ke hui ye hai qaba ki KHubi

nikhat-e-zulf ka lana hai saba ki KHubi

misl-e-aina ke zahir mein safa hain to kya

ahl-e-alam mein hai baatin ki safa ki KHubi

ustuKHwan-reza pe karta hai qanaat jo wo

us se hai sare tuyuron mein huma ki KHubi

jaanwar hai na ho insan mein gar sharm-o-haya

kyon hai insan mein faqat sharm-o-haya ki KHubi

KHubi-e-ahl-e-duwal daulat-o-hashmat se nahin

mutawaze ho yahi hai umara ki KHubi

sehat-o-afiyat-o-farhat-e-rizq-o-iman

aish baKHshi tujhe hai sab ye KHuda ki KHubi