kuchh ilaj-e-dil-e-betab meri jaan ho jae

kuchh ilāj-e-dil-e-betāb mirī jaañ ho jaa.e

aaj agar vasl ke va.ade pe zarā haañ ho jaa.e

ham-nashīñ is ko kahā karte haiñ sohbat kā asar

tiir aa.e mire siine meñ aur armāñ ho jaa.e

haq ne vo mus.haf-e-ruḳhsār tujhe baḳhshā hai

ki jise dekh ke kāfir bhī musalmāñ ho jaa.e

tarz-e-nāla sune andāz-e-fuġhāñ ko dekhe

ġhair baiThe mirī sohbat meñ to insāñ ho jaa.e

haif ai jazba-e-dil tujh se to ye bhī na huā

ki mirī qabr pe vo shoḳh sitam-rāñ ho jaa.e

terī āñkheñ yahī kartī haiñ ishāre zālim

koī be-dil koī bismil koī be-jāñ ho jaa.e

aab ḳhanjar ho nadāmat se pasīna qātil

sāmne mujh sā agar koī garāñ-jāñ ho jaa.e

paañv phailā.e agar vahshat-e-ḳhātir ne yahī

mujhe Dar hai mirā ghar hī na bayābāñ ho jaa.e

tere bismil ko tamanna ho agar jiine kī

jauhar-e-ḳhanjar-e-ḳhuñḳhār rag-e-jāñ ho jaa.e

ik jahāñ meñ tirā shohrā hai masīhā.ī kā

kuchh hamāre bhī dil-e-zār kā darmāñ ho jaa.e

tujh ko ai baḳht-e-siyah is liye ham laa.e the

ki tū yaañ aa ke balā-e-shab-e-hijrāñ ho jaa.e

kis ne dekhā hai qayāmat ko hamārā un kā

faisla aaj hī honā hai jo kuchh haañ ho jaa.e

aañkh saaqī kī jo palTe to palaT jaa.e jahāñ

gardish-e-sāġhar-e-mai gardish-e-daurāñ ho jaa.e

apnā māshūq hai vo ālam-e-tasvīr ai 'mehr'

ki use dekhe to 'bahzād' bhī hairāñ ho jaa.e

kuchh ilaj-e-dil-e-betab meri jaan ho jae

aaj agar wasl ke wade pe zara han ho jae

ham-nashin is ko kaha karte hain sohbat ka asar

tir aae mere sine mein aur arman ho jae

haq ne wo mushaf-e-ruKHsar tujhe baKHsha hai

ki jise dekh ke kafir bhi musalman ho jae

tarz-e-nala sune andaz-e-fughan ko dekhe

ghair baiThe meri sohbat mein to insan ho jae

haif ai jazba-e-dil tujh se to ye bhi na hua

ki meri qabr pe wo shoKH sitam-ran ho jae

teri aankhen yahi karti hain ishaare zalim

koi be-dil koi bismil koi be-jaan ho jae

aab KHanjar ho nadamat se pasina qatil

samne mujh sa agar koi garan-jaan ho jae

panw phailae agar wahshat-e-KHatir ne yahi

mujhe Dar hai mera ghar hi na bayaban ho jae

tere bismil ko tamanna ho agar jine ki

jauhar-e-KHanjar-e-KHunKHar rag-e-jaan ho jae

ek jahan mein tera shohra hai masihai ka

kuchh hamare bhi dil-e-zar ka darman ho jae

tujh ko ai baKHt-e-siyah is liye hum lae the

ki tu yan aa ke bala-e-shab-e-hijran ho jae

kis ne dekha hai qayamat ko hamara un ka

faisla aaj hi hona hai jo kuchh han ho jae

aankh saqi ki jo palTe to palaT jae jahan

gardish-e-saghar-e-mai gardish-e-dauran ho jae

apna mashuq hai wo aalam-e-taswir ai 'mehr'

ki use dekhe to 'bahzad' bhi hairan ho jae