kuchh is ada se koi dam-ba-dam lubhae mujhe

kuchh is adā se koī dam-ba-dam lubhā.e mujhe

ki hārne bhī na de aur āzmā.e mujhe

is intizār meñ huuñ naqsh-e-rā.egāñ ho kar

tirā karam kisī mehrāb meñ sajā.e mujhe

tire nisār kisī aise ġham-gusār ko bhej

ki dil kī bhūl-bhulayyoñ se DhūñD laa.e mujhe

ye jī meñ hai ki sarāpā vo naġhma ban jā.ūñ

ki jis ko tujh se mohabbat ho gungunā.e mujhe

kisī kī dhun meñ pareshāñ to huuñ bikhar hī na jā.ūñ

gale na mauja-e-bād-e-sabā lagā.e mujhe

guloñ se kam nahīñ kāñToñ kī sej bhī 'ḳhurshīd'

ḳhayāl-e-yār agar chain se sulā.e mujhe

kuchh is ada se koi dam-ba-dam lubhae mujhe

ki haarne bhi na de aur aazmae mujhe

is intizar mein hun naqsh-e-raegan ho kar

tera karam kisi mehrab mein sajae mujhe

tere nisar kisi aise gham-gusar ko bhej

ki dil ki bhul-bhulayyon se DhunD lae mujhe

ye ji mein hai ki sarapa wo naghma ban jaun

ki jis ko tujh se mohabbat ho gungunae mujhe

kisi ki dhun mein pareshan to hun bikhar hi na jaun

gale na mauja-e-baad-e-saba lagae mujhe

gulon se kam nahin kanTon ki sej bhi 'KHurshid'

KHayal-e-yar agar chain se sulae mujhe