kuchh is andaz se hain dasht mein aahu nikal aae

kuchh is andāz se haiñ dasht meñ aahū nikal aa.e

ki un ko dekh kar phūloñ ke bhī aañsū nikal aa.e

falak ko kaun sī vaadī barahna-sar nazar aa.ī

garajte bādaloñ ke lashkarī har-sū nikal aa.e

abhī to ek hī dil kā darīcha vā kiyā maiñ ne

yahāñ bahr-e-ziyārat kis qadar jugnū nikal aa.e

jo sajde kī nahīñ to raqs karne kī ijāzat ho

kisī siine se jab bāhar tirī ḳhushbū nikal aa.e

isī ummīd par kaaTā safar tārīk rāhoñ kā

na jaane kaun se gumbad se vo mah-rū nikal aa.e

chaman-zār-e-vafā meñ mausamoñ kī apnī fitrat hai

burīda ek baazū se ka.ī baazū nikal aa.e

kabhī to ehtiyāt-e-zohd se haa.el hue parde

kabhī mastī meñ bhī tasbīh ke pahlū nikal aa.e

kuchh is andaz se hain dasht mein aahu nikal aae

ki un ko dekh kar phulon ke bhi aansu nikal aae

falak ko kaun si wadi barahna-sar nazar aai

garajte baadalon ke lashkari har-su nikal aae

abhi to ek hi dil ka daricha wa kiya main ne

yahan bahr-e-ziyarat kis qadar jugnu nikal aae

jo sajde ki nahin to raqs karne ki ijazat ho

kisi sine se jab bahar teri KHushbu nikal aae

isi ummid par kaTa safar tarik rahon ka

na jaane kaun se gumbad se wo mah-ru nikal aae

chaman-zar-e-wafa mein mausamon ki apni fitrat hai

burida ek bazu se kai bazu nikal aae

kabhi to ehtiyat-e-zohd se hael hue parde

kabhi masti mein bhi tasbih ke pahlu nikal aae