kuchh is tarah ka ajab imtihan dena paDa

kuchh is tarah kā ajab imtihān denā paḌā

mujhe zamīñ ke evaz āsmān denā paḌā

tū jāntā hī nahīñ dīn-e-mustafā kyā hai

husain jaane jise ḳhāndān denā paḌā

jo mujh pe apne hī lashkar se tiir aane lage

adū se haT ke muhāfiz pe dhyān denā paḌā

simaT rahā thā mirā saaya dhuup ke Dar se

dahakte saa.e ko phir sā.ebān denā paḌā

vo jāntā hai tirī ik nazar kī qīmat ko

ki dil ke saath jise ik jahān denā paḌā

vo be-nishān thā lekin mire tavassut se

phir apne hone kā us ko nishān denā paḌā

bhaTak rahā thā hathelī pe le ke apnā shabāb

mujhe phir us ko ye dil kā makān denā paḌā

kuchh is tarah ka ajab imtihan dena paDa

mujhe zamin ke ewaz aasman dena paDa

tu jaanta hi nahin din-e-mustafa kya hai

husain jaane jise KHandan dena paDa

jo mujh pe apne hi lashkar se tir aane lage

adu se haT ke muhafiz pe dhyan dena paDa

simaT raha tha mera saya dhup ke Dar se

dahakte sae ko phir saeban dena paDa

wo jaanta hai teri ek nazar ki qimat ko

ki dil ke sath jise ek jahan dena paDa

wo be-nishan tha lekin mere tawassut se

phir apne hone ka us ko nishan dena paDa

bhaTak raha tha hatheli pe le ke apna shabab

mujhe phir us ko ye dil ka makan dena paDa