kuchh is tarah nigah se izhaar kar gae

kuchh is tarah nigāh se iz.hār kar ga.e

jaise vo mujh ko vāqif-e-asrār kar ga.e

iqrār kar diyā kabhī inkār kar ga.e

be-ḳhud banā diyā kabhī hushyār kar ga.e

yak-tā.i-e-jamāl kī hairat na pūchhiye

har mā-sivā ke vahm se be-zār kar ga.e

kuchh is adā se jalva-e-ma.anī kī sharh kī

mere ḳhayāl-o-fikr ko bekār kar ga.e

allāh re un ke jalva-e-rañgīñ kī fitrateñ

saare jahāñ ko naqsh-ba-dīvār kar ga.e

vaade kā un ke zikr hī 'māhir' fuzūl hai

tum kyā karoge vo agar inkār kar ga.e

kuchh is tarah nigah se izhaar kar gae

jaise wo mujh ko waqif-e-asrar kar gae

iqrar kar diya kabhi inkar kar gae

be-KHud bana diya kabhi hushyar kar gae

yak-tai-e-jamal ki hairat na puchhiye

har ma-siwa ke wahm se be-zar kar gae

kuchh is ada se jalwa-e-mani ki sharh ki

mere KHayal-o-fikr ko bekar kar gae

allah re un ke jalwa-e-rangin ki fitraten

sare jahan ko naqsh-ba-diwar kar gae

wade ka un ke zikr hi 'mahir' fuzul hai

tum kya karoge wo agar inkar kar gae