kuchh is tarah wo dua-o-salam kar ke gaya

kuchh is tarah vo duā-o-salām kar ke gayā

mirī taraf hī ruḳh-e-intiqām kar ke gayā

jahāñ meñ aayā thā insāñ mohabbateñ karne

jo kaam karnā nahīñ thā vo kaam kar ke gayā

asiir hote ga.e bā-dil-e-nā-ḳhvāsta log

ġhulām karnā thā us ne ġhulām kar ke gayā

jo dard so.e hue the vo ho ga.e bedār

ye mo.ajaza bhī mirā ḳhush-ḳhirām kar ke gayā

hai zindagī bhī vahī jo ho dūsroñ ke liye

vo mohtaram huā jo ehtirām kar ke gayā

ye sarzamīñ hai jalāl o jamāl o azmat kī

hai ḳhush-nasīb yahāñ jo qayām kar ke gayā

hai kaun shā.ir-e-ḳhush-fikr kaun hai fankār

ġhazal batā.egī is meñ naam kar ke gayā

asar huā na huā bazm par 'alī-yāsir'

kalām karnā thā maiñ ne kalām kar ke gayā

kuchh is tarah wo dua-o-salam kar ke gaya

meri taraf hi ruKH-e-intiqam kar ke gaya

jahan mein aaya tha insan mohabbaten karne

jo kaam karna nahin tha wo kaam kar ke gaya

asir hote gae ba-dil-e-na-KHwasta log

ghulam karna tha us ne ghulam kar ke gaya

jo dard soe hue the wo ho gae bedar

ye moajaza bhi mera KHush-KHiram kar ke gaya

hai zindagi bhi wahi jo ho dusron ke liye

wo mohtaram hua jo ehtiram kar ke gaya

ye sarzamin hai jalal o jamal o azmat ki

hai KHush-nasib yahan jo qayam kar ke gaya

hai kaun shair-e-KHush-fikr kaun hai fankar

ghazal bataegi is mein nam kar ke gaya

asar hua na hua bazm par 'ali-yasir'

kalam karna tha main ne kalam kar ke gaya