kuchh izala to karen aap bhi taDpane ka

kuchh izāla to kareñ aap bhī taḌpāne kā

dil jo toḌā hai to phir sochiye harjāne kā

na koī ashk na baazū na koī zulf nasīb

koī masraf nazar aayā nahīñ is shāne kā

raat kyā ḳhuub tamāsha thā galī meñ un kī

shaiḳh-jī pūchhā kiye rāsta mai-ḳhāne kā

do ghaḌī dil to bahal jaatā hai tasvīr ke saath

mas.ala hal nahīñ hotā tire dīvāne kā

vasl meñ qurb kī lazzat se bhī mahrūm rahe

us pe ehsāñ bhī rahā aap ke aa jaane kā

is salīqe se gayā haath chhuḌā kar zālim

ki nasha lams kā thā dukh thā bichhaḌ jaane kā

saath aisā thā mayassar ki safar kaTtā gayā

ham ne sochā hī nahīñ raah meñ sustāne kā

sham.a ne dekh ke hī lau bhī baḌhā.ī hogī

har patiñge meñ kahāñ zarf hai jal jaane kā

aap ke chehre kī tamsīl kahā hai is ko

haq to bantā hai yahāñ phuul ke itrāne kā

kuchh izala to karen aap bhi taDpane ka

dil jo toDa hai to phir sochiye harjaane ka

na koi ashk na bazu na koi zulf nasib

koi masraf nazar aaya nahin is shane ka

raat kya KHub tamasha tha gali mein un ki

shaiKH-ji puchha kiye rasta mai-KHane ka

do ghaDi dil to bahal jata hai taswir ke sath

masala hal nahin hota tere diwane ka

wasl mein qurb ki lazzat se bhi mahrum rahe

us pe ehsan bhi raha aap ke aa jaane ka

is saliqe se gaya hath chhuDa kar zalim

ki nasha lams ka tha dukh tha bichhaD jaane ka

sath aisa tha mayassar ki safar kaTta gaya

hum ne socha hi nahin rah mein sustane ka

shama ne dekh ke hi lau bhi baDhai hogi

har patinge mein kahan zarf hai jal jaane ka

aap ke chehre ki tamsil kaha hai is ko

haq to banta hai yahan phul ke itrane ka