kuchh log samajhne hi ko tayar nahin the

kuchh log samajhne hī ko tayār nahīñ the

ham varna koī uqda-e-dushvār nahīñ the

sad-haif ki dekhā hai tujhe dhuup se be-kal

afsos ki ham sāya-e-dīvār nahīñ the

ham itne pareshāñ the ki hāl-e-dil-e-sozāñ

un ko bhī sunāyā ki jo ġham-ḳhvār nahīñ the

sach ye hai ki ik umr guzārī sar-e-maqtal

ham kaun se lamhe meñ sar-e-dār nahīñ the

maanā ki bahut tez thī raftār-e-havādis

ham bhī koī girtī huī dīvār nahīñ the

ye us kī ināyat hai ki apnā ke tumheñ 'shauq'

vo zaḳhm diye jin ke sazā-vār nahīñ the

kuchh log samajhne hi ko tayar nahin the

hum warna koi uqda-e-dushwar nahin the

sad-haif ki dekha hai tujhe dhup se be-kal

afsos ki hum saya-e-diwar nahin the

hum itne pareshan the ki haal-e-dil-e-sozan

un ko bhi sunaya ki jo gham-KHwar nahin the

sach ye hai ki ek umr guzari sar-e-maqtal

hum kaun se lamhe mein sar-e-dar nahin the

mana ki bahut tez thi raftar-e-hawadis

hum bhi koi girti hui diwar nahin the

ye us ki inayat hai ki apna ke tumhein 'shauq'

wo zaKHm diye jin ke saza-war nahin the