kuchh log shamil dauD mein hain taKHt pane ke liye

kuchh log shāmil dauḌ meñ haiñ taḳht paane ke liye

baaqī sabhī koshish meñ haiñ khāne kamāne ke liye

mehnat mashaqqat ke alāva aur kyā hai zindagī

din bhar bhaTaktā hai parinda chaar daane ke liye

kab kaun likhtā hai muqaddar dūsre insān kā

ḳhud raushnī karnī hai ham ko jagmagāne ke liye

saaya buzurgoñ kī duā kā hai zarūrī sar pe yuuñ

jaise zarūrī chhat hai ghar meñ sar chhupāne ke liye

kyā pā liyā kyā kho diyā ye sochte hoñge kabhī

jo log ghar se duur haiñ daulat kamāne ke liye

ḳhud ko mukammal maan kar maiñ chhāñv meñ baiThā nahīñ

maiñ dhuup meñ chaltā huuñ ḳhud ko āzmāne ke liye

kuchh log shamil dauD mein hain taKHt pane ke liye

baqi sabhi koshish mein hain khane kamane ke liye

mehnat mashaqqat ke alawa aur kya hai zindagi

din bhar bhaTakta hai parinda chaar dane ke liye

kab kaun likhta hai muqaddar dusre insan ka

KHud raushni karni hai hum ko jagmagane ke liye

saya buzurgon ki dua ka hai zaruri sar pe yun

jaise zaruri chhat hai ghar mein sar chhupane ke liye

kya pa liya kya kho diya ye sochte honge kabhi

jo log ghar se dur hain daulat kamane ke liye

KHud ko mukammal man kar main chhanw mein baiTha nahin

main dhup mein chalta hun KHud ko aazmane ke liye