kuchh na hone ki haqiqat nahin jaani yani

kuchh na hone kī haqīqat nahīñ jaanī ya.anī

ham har isbāt pe karte rahe ya.anī ya.anī

tah bhī ik sat.h kī ta.abīr hai sunte the yahī

sat.h par tairne vāloñ kī zabānī ya.anī

mil ga.ī ḳhaak meñ buniyād-e-chaman-zār-e-vajūd

apnī me.arāj ko pahuñchī hama-dānī ya.anī

apne mahmil se nikal aa.e jo mahmil meñ nahīñ

vahshat-e-qais ke haiñ aaj ye ma.anī ya.anī

shor-e-da.avā-e-anal-haq hai ki thamtā hī nahīñ

koī suntā hī nahīñ merī kahānī ya.anī

koī hone se ye kam hai ki hue jaatā huuñ

hai na honā mire hone kī nishānī ya.anī

haar samjhe ho jise dhaar hai lamhoñ kī 'muhib'

rishta-e-umr hai ik aks-e-ravānī ya.anī

kuchh na hone ki haqiqat nahin jaani yani

hum har isbaat pe karte rahe yani yani

tah bhi ek sath ki tabir hai sunte the yahi

sath par tairne walon ki zabani yani

mil gai KHak mein buniyaad-e-chaman-zar-e-wajud

apni mearaj ko pahunchi hama-dani yani

apne mahmil se nikal aae jo mahmil mein nahin

wahshat-e-qais ke hain aaj ye mani yani

shor-e-dawa-e-anal-haq hai ki thamta hi nahin

koi sunta hi nahin meri kahani yani

koi hone se ye kam hai ki hue jata hun

hai na hona mere hone ki nishani yani

haar samjhe ho jise dhaar hai lamhon ki 'muhib'

rishta-e-umr hai ek aks-e-rawani yani