kuchh na kuchh ranj wo de jate hain aate jate

kuchh na kuchh ranj vo de jaate haiñ aate jaate

chhoḌ jaate haiñ shagūfe koī jaate jaate

shauq ban ban ke mire dil meñ haiñ aate jaate

dard ban ban ke haiñ pahlū meñ samāte jaate

ḳhair se ġhair ke ghar roz haiñ aate jaate

aur qasmeñ bhī mire sar kī haiñ khāte jaate

haa.e milne se hai un ke mujhe jitnā eraaz

vo usī darja nazar meñ haiñ samāte jaate

nahīñ mālūm vahāñ dil meñ irāda kyā hai

vo jo is darja haiñ iḳhlās baḌhāte jaate

lo mire sāmne ġhairoñ ke gile hote haiñ

lutf meñ bhī to mujhī ko haiñ satāte jaate

aaj ruktī hai marīz-e-ġham-e-ulfat ko shifā

chārāgar dard bhī jā.egā to jaate jaate

yahī hamdam mujhe paiġhām-e-qazā dete haiñ

ye jo siine meñ dam-e-chand haiñ aate jaate

yuuñ hī āḳhir to huā naam azā kā badnām

aa.e the aa ke janāza bhī uThāte jaate

kuchh na kuchh ranj wo de jate hain aate jate

chhoD jate hain shagufe koi jate jate

shauq ban ban ke mere dil mein hain aate jate

dard ban ban ke hain pahlu mein samate jate

KHair se ghair ke ghar roz hain aate jate

aur qasmen bhi mere sar ki hain khate jate

hae milne se hai un ke mujhe jitna eraaz

wo usi darja nazar mein hain samate jate

nahin malum wahan dil mein irada kya hai

wo jo is darja hain iKHlas baDhate jate

lo mere samne ghairon ke gile hote hain

lutf mein bhi to mujhi ko hain satate jate

aaj rukti hai mariz-e-gham-e-ulfat ko shifa

chaaragar dard bhi jaega to jate jate

yahi hamdam mujhe paigham-e-qaza dete hain

ye jo sine mein dam-e-chand hain aate jate

yun hi aaKHir to hua nam aza ka badnam

aae the aa ke janaza bhi uThate jate