kuchh nae KHwab har ek fasl mein pale gae hain

kuchh na.e ḳhvāb har ik fasl meñ paale ga.e haiñ

ham isī jurm meñ bastī se nikāle ga.e haiñ

abhī zanjīr-e-junūñ paañv meñ Daale ga.e haiñ

dekh kis samt tire chāhne vaale ga.e haiñ

kaun is shahr-e-charāġhāñ meñ abhī aayā thā

duur tak us ke ta.āqub meñ ujāle ga.e haiñ

hākim-e-vaqt ke qadmoñ pe sabhī ibn-ul-vaqt

rakh ke dastār ko sar apnā bachā le ga.e haiñ

tīrgī kyuuñ na mire ḳhāna-e-hastī meñ rahe

vo sabhī jalte charāġhoñ ko uThā le ga.e haiñ

kyā kaheñ guzre hue vaqt ke baare meñ 'salīm'

saḳhat mushkil se dil-o-jāñ ye sambhāle ga.e haiñ

kuchh nae KHwab har ek fasl mein pale gae hain

hum isi jurm mein basti se nikale gae hain

abhi zanjir-e-junun panw mein Dale gae hain

dekh kis samt tere chahne wale gae hain

kaun is shahr-e-charaghan mein abhi aaya tha

dur tak us ke taaqub mein ujale gae hain

hakim-e-waqt ke qadmon pe sabhi ibn-ul-waqt

rakh ke dastar ko sar apna bacha le gae hain

tirgi kyun na mere KHana-e-hasti mein rahe

wo sabhi jalte charaghon ko uTha le gae hain

kya kahen guzre hue waqt ke bare mein 'salim'

saKHat mushkil se dil-o-jaan ye sambhaale gae hain