kuchh naqsh huwaida hain KHayalon ki Dagar se

kuchh naqsh huvaidā haiñ ḳhayāloñ kī Dagar se

shāyad kabhī guzrā huuñ maiñ is rāh-guzar se

galiyāñ bhī haiñ sunsān darīche bhī haiñ ḳhāmosh

qadmoñ kī ye āvāz dar aa.ī hai kidhar se

tāqoñ meñ charāġhoñ kā dhuāñ jam sā gayā hai

ab ham bhī nikalte nahīñ ujḌe hue ghar se

kyuuñ kāġhzī phūloñ se sajātā nahīñ ghar ko

is daur ko shikva hai mire zauq-e-hunar se

saa.e kī tarah koī ta.āqub meñ ravāñ hai

ab bach ke kahāñ jā.eñge ik sho.abda-gar se

'aḳhtar' ye ghane abr baḌe tañg-nazar haiñ

uTThe haiñ jo dariyā se to dariyā pe hī barse

kuchh naqsh huwaida hain KHayalon ki Dagar se

shayad kabhi guzra hun main is rah-guzar se

galiyan bhi hain sunsan dariche bhi hain KHamosh

qadmon ki ye aawaz dar aai hai kidhar se

taqon mein charaghon ka dhuan jam sa gaya hai

ab hum bhi nikalte nahin ujDe hue ghar se

kyun kaghzi phulon se sajata nahin ghar ko

is daur ko shikwa hai mere zauq-e-hunar se

sae ki tarah koi taaqub mein rawan hai

ab bach ke kahan jaenge ek shoabda-gar se

'aKHtar' ye ghane abr baDe tang-nazar hain

uTThe hain jo dariya se to dariya pe hi barse