kuchh sazaen aur bhi hain taziyanon se pare

kuchh sazā.eñ aur bhī haiñ tāziyānoñ se pare

ik asīrī aur bhī hai qaid-ḳhānoñ se pare

ḳhuun jin kā dauḌtā hai sab mashīnoñ meñ yahāñ

vo sisakte log haiñ in kār-ḳhānoñ se pare

jis ke dam se thiiñ hamāre shahr kī sab raunaqeñ

vo bhī jā ke bas gayā hai do jahānoñ se pare

vālihāna raqs kartī jā rahī thī saath saath

Dūbte sūraj kī laalī sārbānoñ se pare

kuchh to lahroñ se hamārī chal rahī thī dushmanī

kuchh havā bhī sāzishī thī bādbānoñ se pare

ik ḳhalā ne mustaqil mujh meñ Thikāna kar liyā

ik ḳhalā phailā huā hai āsmānoñ se pare

mujh se vo miltā hai 'āsif' aadmī ke bhes meñ

us kā mujh se rābta hai āstānoñ se pare

kuchh sazaen aur bhi hain taziyanon se pare

ek asiri aur bhi hai qaid-KHanon se pare

KHun jin ka dauDta hai sab mashinon mein yahan

wo sisakte log hain in kar-KHanon se pare

jis ke dam se thin hamare shahr ki sab raunaqen

wo bhi ja ke bas gaya hai do jahanon se pare

walihana raqs karti ja rahi thi sath sath

Dubte suraj ki lali sarbanon se pare

kuchh to lahron se hamari chal rahi thi dushmani

kuchh hawa bhi sazishi thi baadbanon se pare

ek KHala ne mustaqil mujh mein Thikana kar liya

ek KHala phaila hua hai aasmanon se pare

mujh se wo milta hai 'asif' aadmi ke bhes mein

us ka mujh se rabta hai aastanon se pare