kuchh shafaq Dubte suraj ki bacha li jae

kuchh shafaq Dūbte sūraj kī bachā lī jaa.e

rañg-e-imkāñ se koī shakl banā lī jaa.e

harf mohmal sā koī haath pe us ke rakh do

qaht kaisā hai ki har saañs savālī jaa.e

shahr-e-malbūs meñ kyuuñ itnā barahna rahiye

koī chhat yā koī dīvār-e-ḳhayālī jaa.e

saath ho letā hai har shaam vahī sannāTā

ghar ko jaane kī na.ī raah nikālī jaa.e

pheñk āñkhoñ ko kisī jhiil kī gahrā.ī meñ

but koī soch ki āvāra ḳhayālī jaa.e

tishna-e-zaḳhm na rahne de badan ko 'ahmad'

aisī talvār sar-e-shahr uchhālī jaa.e

kuchh shafaq Dubte suraj ki bacha li jae

rang-e-imkan se koi shakl bana li jae

harf mohmal sa koi hath pe us ke rakh do

qaht kaisa hai ki har sans sawali jae

shahr-e-malbus mein kyun itna barahna rahiye

koi chhat ya koi diwar-e-KHayali jae

sath ho leta hai har sham wahi sannaTa

ghar ko jaane ki nai rah nikali jae

phenk aankhon ko kisi jhil ki gahrai mein

but koi soch ki aawara KHayali jae

tishna-e-zaKHm na rahne de badan ko 'ahmad'

aisi talwar sar-e-shahr uchhaali jae