kuchh to ai yar ilaj-e-gham-e-tanhai ho

kuchh to ai yaar ilāj-e-ġham-e-tanhā.ī ho

baat itnī bhī na baḌh jaa.e ki rusvā.ī ho

Dūbne vaale to āñkhoñ se bhī kab nikle haiñ

Dūbne ke liye lāzim nahīñ gahrā.ī ho

jis ne bhī mujh ko tamāshā sā banā rakkhā hai

ab zarūrī hai vahī shaḳhs tamāshā.ī ho

maiñ mohabbat meñ luTā baiThā huuñ dil kī duniyā

kaam ye aisā bhī kab hai ki pazīrā.ī ho

ajnabī tum se koī baat jo kar lī maiñ ne

log kahne lage harjā.ī ho harjā.ī ho

koī anjān na ho shahr-e-mohabbat kā makīñ

kaash har dil kī har ik dil se shanāsā.ī ho

maiñ mohabbat ko chhupātā rahā lekin be-sūd

baat chhuptī hai kahāñ jis meñ ki sachchā.ī ho

aaj to bazm meñ har aañkh thī pur-nam jaise

dāstāñ merī kisī ne yahāñ dohrā.ī ho

maiñ tujhe jiit bhī tohfe meñ nahīñ de saktā

chāhtā ye bhī nahīñ huuñ tirī paspā.ī ho

ab ke sāvan to barastā huā yuuñ lagtā hai

āsmāñ par bhī tire ġham kī ghaTā chhā.ī ho

yuuñ guzar jaatā hai 'imrran' tire kūche se

terā vāqif na ho jaise koī saudā.ī ho

kuchh to ai yar ilaj-e-gham-e-tanhai ho

baat itni bhi na baDh jae ki ruswai ho

Dubne wale to aankhon se bhi kab nikle hain

Dubne ke liye lazim nahin gahrai ho

jis ne bhi mujh ko tamasha sa bana rakkha hai

ab zaruri hai wahi shaKHs tamashai ho

main mohabbat mein luTa baiTha hun dil ki duniya

kaam ye aisa bhi kab hai ki pazirai ho

ajnabi tum se koi baat jo kar li main ne

log kahne lage harjai ho harjai ho

koi anjaan na ho shahr-e-mohabbat ka makin

kash har dil ki har ek dil se shanasai ho

main mohabbat ko chhupata raha lekin be-sud

baat chhupti hai kahan jis mein ki sachchai ho

aaj to bazm mein har aankh thi pur-nam jaise

dastan meri kisi ne yahan dohrai ho

main tujhe jit bhi tohfe mein nahin de sakta

chahta ye bhi nahin hun teri paspai ho

ab ke sawan to barasta hua yun lagta hai

aasman par bhi tere gham ki ghaTa chhai ho

yun guzar jata hai 'imrran' tere kuche se

tera waqif na ho jaise koi saudai ho