kuchh to is karb-e-musalsal ki dawa do mujhko

kuchh to is karb-e-musalsal kī davā do mujh ko

koī naġhma hī mohabbat kā sunā do mujh ko

pyaas ab had se guzarne kī tamannā.ī hai

apnī maḳhmūr nigāhoñ se pilā do mujh ko

be-ḳhayālī ke liye tum se mu'āfī lekin

tum ise jurm samajhte ho sazā do mujh ko

is se pahle ki maiñ sahrā meñ bhaTak jā.ūñ kahīñ

mere rastoñ merī manzil kā pata do mujh ko

maiñ kise kah duuñ zamāne meñ tumhāre jaisā

dūsrā koī to apnā sā dikhā do mujh ko

itnā dushvār nahīñ huuñ ki samajh hī na sako

itnā āsāñ bhī nahīñ huuñ ki bhulā do mujh ko

kuchh to is karb-e-musalsal ki dawa do mujh ko

koi naghma hi mohabbat ka suna do mujh ko

pyas ab had se guzarne ki tamannai hai

apni maKHmur nigahon se pila do mujh ko

be-KHayali ke liye tum se mu'afi lekin

tum ise jurm samajhte ho saza do mujh ko

is se pahle ki main sahra mein bhaTak jaun kahin

mere raston meri manzil ka pata do mujh ko

main kise kah dun zamane mein tumhaare jaisa

dusra koi to apna sa dikha do mujh ko

itna dushwar nahin hun ki samajh hi na sako

itna aasan bhi nahin hun ki bhula do mujh ko