kuchh to wufur-e-shauq mein bais-e-imtiyaz ho

kuchh to vufūr-e-shauq meñ bā.is-e-imtiyāz ho

merī nazar ke sāmne un kī harīm-e-nāz ho

soz-e-darūñ va āh-e-dil 'ishq meñ donoñ ek haiñ

ham ko to ik surūr hai soz ho yā ki saaz ho

vo dil-e-nazāra-kosh terā ye zauq-e-be-ḳhudī

jalve kī taab ho na ho un kī harīm-e-nāz ho

naaz hai shauq-e-āfrīñ shauq hai shorish-e-dimāġh

husn hai ārzū-pasand 'ishq junūñ-navāz ho

zauq-e-talab ko 'ishq ne turfa sabaq ye de diyā

nāla-e-dil-ḳharāsh ban āh-e-jigar-gudāz ho

dil kī taḌap meñ ai ḳhudā kuchh to ho zauq-e-āfiyat

dard vo de jo 'ishq meñ bā.is-e-imtiyāz ho

'farhat'-e-ārzū-pasand dars-e-niyāz-e-ishq ne

kūcha-e-ma.arifat meñ aa shefta majāz ho

kuchh to wufur-e-shauq mein bais-e-imtiyaz ho

meri nazar ke samne un ki harim-e-naz ho

soz-e-darun wa aah-e-dil 'ishq mein donon ek hain

hum ko to ek surur hai soz ho ya ki saz ho

wo dil-e-nazara-kosh tera ye zauq-e-be-KHudi

jalwe ki tab ho na ho un ki harim-e-naz ho

naz hai shauq-e-afrin shauq hai shorish-e-dimagh

husn hai aarzu-pasand 'ishq junun-nawaz ho

zauq-e-talab ko 'ishq ne turfa sabaq ye de diya

nala-e-dil-KHarash ban aah-e-jigar-gudaz ho

dil ki taDap mein ai KHuda kuchh to ho zauq-e-afiyat

dard wo de jo 'ishq mein bais-e-imtiyaz ho

'farhat'-e-arzu-pasand dars-e-niyaz-e-ishq ne

kucha-e-marifat mein aa shefta majaz ho